Texas, Berisha nderohet me Çelësin e Qytetit të Mesquite

Një vlerësim i veçantë dhe simbolik për liderin e opozitës shqiptare në Shtetet e Bashkuara. Kryetari i Partisë Demokratike, Sali Berisha, është nderuar me Çelësin e Qytetit të Mesquite, në Texas. Çelësi iu dorëzua Berishës nga Kryebashkiaku i Mesquite, Daniel Aleman Jr.

Gjatë ceremonisë, Aleman e cilësoi Çelësin e Qytetit si nderimin më të lartë qytetar që bashkia mund t’i japë një personi, vlerësim i cili përfaqëson respektin, besimin dhe marrëdhëniet e veçanta mes komunitetit të Mesquite dhe shqiptarëve.

Nderimi për Berishën vjen si vlerësim për kontributin e tij në drejtimin politik të Shqipërisë dhe angazhimin për forcimin e marrëdhënieve dhe bashkëpunimit mes Shqipërisë dhe Shteteve të Bashkuara.

Ceremonia në Mesquite merr një tjetër dimension për komunitetin shqiptar në Texas, duke shërbyer si një simbol i lidhjeve të forta shqiptaro-amerikane dhe i rolit që diaspora shqiptare ka në forcimin e këtyre marrëdhënieve.

Ndryshe, Mesquite, është një qytet në periferi të Dallasit, me 150 mijë banorë sipas censusit të vitit 2020. I njohur zyrtarisht si “Kryeqyteti i Rodeos në Texas”, qyteti është vlerësuar gjithashtu për hapësirat rekreative dhe gjelbërimin. Mesquite ka aeroportin e vet dhe është një qendër e rëndësishme ekonomike, ku veprojnë kompani dhe institucione të mëdha si UPS, AT&T, FedEx, Ashley Furniture, Charter Spectrum dhe Eastfield College.