FSK-së i shtohen 12 kamionë ushtarak, Kurit: Gjatë vitit 2027, edhe dhjetëra të tjerë

Forcës së Sigurisë së Kosovës, FSK, i janë shtuar 12 kamionë ushtarakë Unimog 5T, 4×4, të tipit Mercedes-Benz, ndërsa dhjetëra automjete të tjera Unimog dhe Rheinmetall janë blerë dhe pritet të arrijnë gjatë vitit 2027.

Këtë e ka bërë të ditur Kryeministri i Kosovës, Albin Kurti, përmes rrjjetit social Facebook duke theksuar se për pajisjen e FSK-së me automjete të reja për transport dhe mbështetje logjistike.

“12 kamionë ushtarakë Unimog 5T, 4×4, të tipit Mercedes Benz iu shtuan sot flotës prej 15 kamionëve Rheinmetall. Ditë më parë kanë arritur edhe 8 kamionë të tjerë KX 8×8 të blerë nga Rheinmetall. Me këto prurje të reja, numri i kamionëve të këtyre dy kategorive arrin në 35 automjete. Dhjetëra kamionë të tjerë Unimog dhe Rheinmetall janë blerë dhe do të vijnë në vitin 2027,” tha Albin Kurti duke sqaruar se kamionët Unimog 5T janë të projektuar për të ofruar lëvizshmëri në terrene të vështira, përfshirë rrugët e paasfaltuara dhe zonat malore, kurse kamionët Rheinmetall me konfigurim 8×8 shtojnë kapacitetet transportuese të FSK-së dhe kontribuojnë në forcimin e mbështetjes logjistike,” tha Kryeministri i Koosv, Albin Kurti, duke përfunduar:

“Një forcë moderne nuk ndërtohet vetëm përmes armatimit dhe pajisjeve luftarake, por edhe përmes kapaciteteve që i mundësojnë asaj të lëvizë, të furnizohet dhe të veprojë në mënyrë efikase. Këto investime janë pjesë e angazhimit tonë për të forcuar kapacitetet mbrojtëse të Republikës së Kosovës, në përputhje me standardet e NATO-s dhe me synimin për të garantuar sigurinë e vendit dhe të gjithë qytetarëve tanë.”

Për këtë çështje ka folur edhe ministri i Mbrojtjes, Ejup Maqedonci, i cili së bashku me Kryeministrin Albin Kurti, Komandantin e FSK-së, Gjenerallejtënant Bashkim Jashari, Ambasadorin e Gjermanisë në Kosovë, Rainer Rudolph, dhe përfaqësuesin e Daimler Truck Defence dhe Mercedes-Benz Special Trucks, Daniel Zittel, morën pjesë në dorëzimin e 12 kamionëve ushtarakë UNIMOG – Mercedes Benz 5T, 4×4, të blerë për nevojat e Forcës së Sigurisë së Kosovës.

“Përveç blerjeve, Gjermania po e mbështet FSK-në edhe përmes donacioneve. Në vitin 2024 pranuam pesë kamionë Rheinmetall KX 8×8 si donacion nga Gjermania. Sipas planifikimit, gjatë vitit 2027 presim të pranojmë edhe dy kamionë Rheinmetall KX 8×8 dhe katër kamionë zjarrfikës UNIMOG – Mercedes Benz si donacion nga Gjermania. E vlerësojmë këtë mbështetje konkrete dhe partneritetin e vazhdueshëm mes vendeve tona,” shprehet Ejup Maqedonci përmes rrjetit social Facebook duke përfunduar:

“Një forcë moderne ka nevojë për kapacitete që i mundësojnë të lëvizë, të furnizohet dhe të përmbushë detyrat e saj. Logjistika është pjesë thelbësore e gatishmërisë operacionale. Do të vazhdojmë të investojmë në pajisje, infrastrukturë dhe kapacitete njerëzore, për një forcë profesionale, moderne dhe të ndërveprueshme me partnerët tanë, në shërbim të sigurisë së Republikës së Kosovës dhe qytetarëve të saj.”