“Tahiri” në Bundestag, Rama: U pyetëm për këtë çështje
Kryeministri Edi Rama shkeli në tokën shqiptare me entuziazëm, dhe për të treguar se po sjell lajm të madh ftoi mediat në aeroport për të dhënë haberin e madh. Por sërish fluskë sapuni, që tejkaloi të githa retorikat integruese. Pas një fjalimi bosh ngeli pa përgjigje edhe pyetja e gazetarit nëse Kancelarja Merkel kishte përmend Saimir Tahirin:
”Me kancelaren kemi folur në detaje për të gjitha aspektet e Raportit të Progresit, për ecurinë në të 5 prioritetet, në mënyrë të veçantë ecurinë e reformës në drejtësi dhe patjetër për progresin e bërë me vettingun, që, siç e dini dhe ju, përbën një moment shumë të rëndësishëm dhe ka një vëmendje shumë të veçantë nga të gjithë, por edhe nga vetë kancelaria gjermane.”
Por kryeministri nuk iu shmang dot pyetjes nëse kjo çështje ishte lakuar në Bundestag përkatësisht Komisionin e Çështjeve Europiane.
“Është bërë një pyetje në Komisionin e Çështjeve Europiane lidhur me këtë çështje dhe lidhur me pozicionin tonë në këtë proces.”
Por për kryeministrin nuk ishte thjeshtë një pyetje e ngritur nga deputetët gjermanë, dhe si pronar i një televizioni gjigand, Edi Rama burimin e gjen në Tiranë, tek opozita shqiptare.
“Pyetje që sigurisht ka pasur të bëjë në thelbin e shqetësimit të vet edhe me baltën e eksportuar atje dhe me tregimin e deformuar të kësaj historie. Por ne kemi qenë në Gjermani, nuk kemi qenë në Venezuelë, ku të na kërkohet që të kapim dikë dhe ta çojmë përpara drejtësisë, sepse kjo është një çështje e drejtësisë dhe këtë në Gjermani e dinë që kur marrin qumështin e nënës.”
Dhe derisa avioni i Ramës po ulej në pistën e aeroportit “Nënë Tereza” dhe opinion shqiptar ende nuk kishte dëgjuar nga goja e Ramës “vizitën e suksesshme në Gjermani, e cila ka përmbushur objektivat”, kryetari i Komisionit për Çështjet e BE në Bundestag, Kirchbaum kishte sqaruar se në takim me kryeministrin shqiptar në Berlin, ai ishte shprehur se rekomandimi i Komisionit Europian ishte i parakohshëm dhe me këto reforma që janë bërë deri tani dhe ky progres është i pamjaftueshëm për të çelur bisedimet në qershor. Pas “shitjes” së madhe që I bëri vizitës në Berlin, Rama edhe këtë deklaratë të Kirchbaum e mohoi:
“Mund t’ju them që ai nuk ma ka thënë këtë gjë, por nuk është një surprizë për mua. Ai kështu e mendon dhe është një nga nuk e di sesa qindra deputetët e Bundstag-ut. Kështu që mendimi i tij ka atë peshë që ka, por as nuk më gjen të papërgatitur dhe as nuk përbën një arsye për mua që të më ulet kënaqësia e rezultateve të kësaj vizite.”
Fjala e Edi Ramës:
Jam në këtë komunikim këtu, menjëherë pas vizitës në Berlin, e cila këtë herë kishte një rëndësi të posaçme për momentin historik në të cilin ndodhet Shqipëria, por edhe një ngarkesë të pazakonshme për domosdoshmërinë e kryerjes së sa më shumë kontakteve, në mënyrë që mesazhet tona të mbërrinin në sa më shumë drejtime. Për këtë kemi takuar jo vetëm Kancelaren, Presidentin e Bundestag-ut, anëtarët e Komisionit të Çështjeve Europiane në Bundestag, por edhe deputetë të veçantë e grupe deputetësh të fraksioneve të ndryshme të Bundestagut.
Besoj që takimi me Kancelaren, që ka pasuar konferencën e përbashkët për shtyp, përmbajtjen e të cilës ju e dini, ka qenë një moment shumë i rëndësishëm i vizitës, e cila na ka dhënë mundësinë të shkëmbejmë në mënyrë të drejtpërdrejtë dhe shumë të hapur opinionet lidhur me Raportin e Progresit, lidhur me rezultatet e arritura në procesin e përgatitjes për çeljen e negociatave, me përmbushjen e parakushteve, siç i konsideroi Kancelarja ato që janë në fakt pjesë të procesit të integrimit në marrëdhëniet me Komisionin Europian për të ardhur tek rekomandimi pozitiv.
Po ashtu kemi pasur edhe një bisedë goxha të gjerë lidhur me rajonin, me zhvillimet në rajon, situatën në të gjitha vendet e rajonit dhe padyshim me perspektivën e qershorit, duke pasur parasysh se më parë do të kemi një stacion tjetër shumë të rëndësishëm në Sofje, ku do të organizohet Samiti Europian për Ballkanin Perëndimor, në praninë e të gjithë vendeve anëtare të Bashkimit Europian dhe nën kujdesin e presidencës bullgare.
Besoj që kjo vizitë mund të konsiderohet e suksesshme për përmbushjen e objektivave që kishim dhe jam i bindur që në fund të vizitës ka një kuptim më të plotë dhe më të detajuar nga ana e të gjithë aktorëve lidhur me pozicionin në të cilin gjendet sot, Shqipëria dhe me legjitimitetin e plotë të kërkesës tonë, që Raporti i Komisionit të mbështet nga qeveria dhe nga parlamenti gjerman.
