Iku në Politeknik, Rama: Me këtë edukatë s’ka kalorifer, s’ka bibliotekë dixhitale, s’ka tarifë që iu bën derman…

Kryeministri Edi Rama edhe sot është përballur me student që nuk i binden të parit të qeverisë sepse janë të mashtruar, janë të gënjyer dhe kanë përballë njeriun që nuk i përfillë kërkesat e tyre elementare.

Ishin studentët e Universiteti Politeknik, Fakultetit të Arkitekturës dhe Urbanistikës që në përballje me Edi Ramën tronditën opinionin e gjërë. Opinioni public dëgjoi nga studentët e Politeknikut se ata nuk kanë as dërrasë dhe flitet për premtimet e buxhetit, njëri I bëri vërejtje për fjalorin denigrues që përdor kryeministri për studentët protestues ndërsa kulmi I kësaj përballje ishte një studente e cila foli për debatin që kishte pasur me kryeministrin përmes teleonit, debat i cili kishte përfunduar me telefonatën që i kishte bërë Edi Rama në orën 22:30.

Epilogu ishte fatal, dhe si në ccdo universitet, edhe te Politekniku Edi Rama i detyroi studentët e pabindur të largohen, për t’ju thënë në fund:

Me këtë edukatë s’ka kalorifer, s’ka bibliotekë dixhitale, s’ka tarifë që iu bën derman…

Por si filloi e gjitha:

Studenti: Nuk kemi një dërrasë, unë jam student tek arkitektura dhe nuk kemi asnjë lloj kushti. Mos të flas për kushtet e tjera më minimale që mungojnë të gjithë. Po ashtu nuk dimë se ku shkojnë lekët tona, se kush është administratori për këto lekë që ne paguajmë.

Rama: Ja pra kjo është një provë tjetër e qartë, që duhet dialogu për të gjitha këto që ju sapo thatë. Për sa u tha administratori nuk vendos për buxhetin dhe si ndahet, nuk vendosa as për si e qysh bëhet buxheti. Buxhetet diskutohen me departamente, me fakultet dhe ën fund tek rektorati dhe senati. Po të shikoni ligjin që shumë kush e kundërshton, por nuk e lexon janë të gjitha të detajuara sesi ndahet buxheti. Dialogun e kërkoj se kërkesat tuaja janë të drejta. Senati duhet të funksiononte dhe të adresonte të gjitha këto që thatë ju këtu.

Më pas mikrofonin e mori një prej studentëve që është parë në 16 ditë të protestës dhe një nga ata të cilët më së shumti është dëgjuar të flasë me megafon e t’i drejtohet ministres Nikolla e Ramës gjithashtu.

Fillimisht ai i është drejtuar kryeministrit duke i thënë se nuk mund t’i quaj ata të paedukatë pasi ka qenë vetë ai që i ka quajtur ngelësa, tru gomari, dhe e epitete të tjera. Më pas ai ka marrë një për një pikat e kërkesave duke kërkuar llogari sesi do t’i plotësojë, ndërsa ka shtuar se nëse ka premtuar ulje tarifash për bachelorin, për masterin nuk e ka bërë.

Më pas ai i ka thënë Edi Ramës se nuk mund ta imagjinojë dot se si një kryeministër, si Merkel apo të tjerë, të përdorë në atë lloj forme Instagramin.

“Si e ke hallin, do humor? Do të të bëj që të qesh gjithë Shqipëria me ty? S’të jap llogari ty se si e perdor Instagramin dhe se si flas, s’të jap llogari ty fare. Unë s’të kam thënë ngelës, por kam bërë një koment me të gjithë ata që shkruajnë. Dhe i kam bërë një pyetje dikujt që shkruan aty dhe i kam thënë nëse ai ishte i gatshëm të paguaj taksë per ngelsat,” iu drejtua Rama.

S’më lini të flas se e di çfarë do them…

Një debat i ashpër ka qenë ai mes një studenteje dhe kryemistrit, e cila është ngritur dhe ka marrë fjalën pa leje duke i thënë se nuk e lë të flasë sepse ai e dinte se për çfarë do fliste ajo.

Derisa kryeministri i kundërshtoi ato që po thoshte studentja ajo u detyrua ta bëjë publike mesazhin që ka shkëmbyer me Edi Ramën, i cili i ka kthyer përgjigje, ndërsa më pas ajo është shprehur se e ka marrë në telefon, e madje ka thënë se edhe e ka kërcënuar se do t’i heqë prindërit nga puna…

Debati i plotë:

Studentja: Në fjalorin tuaj kush fjalë janë të papërshtatshme ose kush fjalë konsiderohen ofenduese. Fjala zhvatje me vetëdije konsiderohet ofenduese?

Rama: Skandaloze.

Studentja: Skandaloze? Pse është skandaloze kur ajo po bëhet realisht?

Rama: S’ta shpjegoj dot

Studentja: Unë e kuptoj, ju se keni shpjeguar. Edhe mbrëmë nuk më keni dhënë përgjigje.

Rama: Të lutem, mbasi më ke shkruar atë fjalë.

Studentja: Jo më keni thënë, ta them unë ça me keni thënë.

Rama: Lexoje.

Studentja: Më keni thënë gjatë gjithë këtyre ditëve jeni treguar në një nivel shumë të lartë dembelash mendorë.

Rama: S’është fjalia ime kjo.

Studentja: Është fjalia juaj,  është fjalia juaj zoti Rama. Më keni marrë në telefon në orën 10 e gjysëm.

Rama: Shiko…

Studentja: Të mbaroj unë pastaj fol, ashti siç ja bërë të gjithëve.

Rama: Lexoje.

Studentja: Të mbaroj unë.

Rama: Lexoje.

Studentja: Të mbaroj unë dhe pastaj flisni ju.

Rama: Jo, lexoje në mënyrë korrekte.

Studentja: Po, ta them unë tani kush është mënyra korrekte.

Rama: Ti dhe kush do që mendon si ti mua më merr të keqen për zhvatjen me vetëdije.

Studentja: Dhe për ju, ça jemi ne për fal. Ça jemi ne për ju?

Rama: Kam folur

Studentja: Jemi lolo të qeverise?

Rama: Qetësohu, qetësohu.

Studentja: Jemi lolo të qeverise? Apo marioneta të atyre që janë mbi ne? Që janë nën vartës tuaj?

Rama: Ky është një tregues tjetër i një të vërtete shumë të thjeshtë. Unë i respektoj të gjithë ata që mua më shkruajnë.

Studentja: Nuk ke bërë asnjë respekt zoti Rama.

Rama: Një minutë moj, një minutë, të të shpjegoj, një minutë

Studentja: Nuk ke çfarë shpjegon e ke thënë troç me fjalët e tua. Edhe kur më more në telefon.

Rama: O xhan, një minutë moj një minutë. Një minutë se të sheh gjithë Shqipëria sot.

Studentja: E di shumë mirë që më sheh gjithë Shqipëria dhe i them edhe unë të gjithë shqiptarëve që ju nuk doni dialog.

Rama: The..
Studentja: Ju doni monolog me veten tuaj.

Rama: The..

Studentja: Nuk na blini dot siç ke blerë 100 a 1 mijë FRESSH-ista.
(Duartrokitje dëgjohen në sallë dhe thirrje “bravo”)

Studentja: Nuk keni ça bëni me ne zoti Rama. Nuk na ulni dot poshtë duke thënë që do iu heqim prindërit nga puna. Duke kërcënuar me makina, nuk na ulni dot poshtë. Zërin tonë do e dëgjoni. Deri tani thatë, ishte një pikë që kërkuat kush pikë nuk funksionon në ligjin. Ju nuk doni të dëgjoni. Ju doni vetëm të flisni. Nuk doni ta dëgjoni popullin, doni vetëm të flisni vetë, të bëni monolog vetë.

Rama: Populli? Ti je populli?

Studentja: Nuk jam unë, jemi të gjithë.

(Duartrokitje në sallë)

Rama: Mbarove?

Studentja: Nuk kam mbaruar akoma. S’kam mbaruar akoma se ky është diçka e manipuluar jo dialog. Dialogu duhet të ishte bërë me të gjithë studentët edhe jo në çdo universitete veç e veç. Me të gjithë. Kemi qenë të gjithë bashkë që ditën e parë. Dhe ju po luani atë lojën kukafshehti. Kalush do futet? Hajt se po futem unë me dekanin, ja se po futem unë me rektorin. Këtë keni bërë në të gjithë universitetet. Duke filluar që nga UBT. Ky nuk është dialog. Kush nuk do të rrijë le të dali. Kush do të rrijë të dëgjojë monolog, të rri këtu.

Studentja lë mikrofonin dhe largohet me një të tjerë grup studentësh, ndërsa në sallë dëgjohen rritje “Bravo”.

Teksa grupi i studentëve largohen, flet Rama: Edukatën, edukatën atë shikoni.

Një tjetër studente, e cila ishte duke dalë, i kthehet Ramës: Edukatën e kemi mësuar nga ju.

Rama: Edukatën se me këtë edukatë s’ka kalorifer e s’ka bibliotekë dixhitale e s’ka tarifë që iu bën derman.

Studentja: Ju duhet ta dini që unë jam me ju. Jam gati për 8 pikat. Dua të diskutojmë si dhe kur do realizohen. Jo nëse do realizohen, por kur do realizohen.

Rama: A ka mundësi, jashtë shëndet.

Grupi i studentëve largohet nga salla, ndërsa biseda në sallë vijon edhe rreth 10 minuta të tjera, para se takimi të përfundojë. Ndryshe, Fakulteti i Arkitekturës ishte iniciator për protestën studentore, e cila nisi për një VKM për tarifat e provimeve të mbartura dhe mori masa kombëtare, protest e cila vazhdon edhe sot…