Ina Nuka kthehet në atdhe: Kurrë s’do heq dorë nga Policia, ndjehem e përulur para shqiptarëve

“Policia është ëndrra ime, nuk do tërhiqem kurrë, çka më ndodhi më ka bërë më të fortë, më të motivuar. Ndjehem e përulur para gjithë shqiptarëve të cilët u bënë pjesë me mesazhet e tyre!” Kështu u shprehë punonjësja e policisë, Ina Nuka sapo mbërriti mbrëmë në Rinas pas trajtimit të specializuar mjekësor në Ankara të Turqisë duke falënderuar Kryeministrin, Ministrin e Brendshëm dhe Drejtorin e Përgjithshëm të Policisë së Shtetit, për inkurajimin dhe mbështetjen që i dhanë, kolegët dhe cilindo që u bë pjesë e dhimbjes së saj.

“Falënderim i veçantë për mjekët e spitalit në Ankara, të cilët kryen tre operacione për të rikuperuar dëmtimin e madh të gishtave të dorës, si dhe qeverinë turke dhe ambasadorin e Shqipërisë në Turqi,” tha Ina Nuka duke shprehë profesionalizmin edhe me këtë rast:

“Unë jam punonjëse Policie, isha duke bërë detyrën dhe zbatuar ligjin, s’kam asnjë mëri personale me askënd, për cilindo që shkel ligjin, të veprojë ligji. Dua të përcjell një mesazh, të mos reflektojmë dhunë, të mbrojmë jetën e ta duam më shumë atë,” tha punonjësja e policisë Ina Nuka duke e bërë të qartë edhe arsyen pse kurrë nuk do të heqë dorë nga policia:

“Kurrë s’do heq dorë nga Policia, pasi jam privuar nga shumë gjëra të tjera për të realizuar ëndrrën time, të jem pjesë e Policisë së Shtetit.”

Në Rinas, Ina Nuka u prit nga Zv/ministrja e Brendshme Romina Kuko, Drejtori i Përgjithshëm i Policisë së Shtetit Ardi Veliu, Drejtori i Departamentit për Sigurinë Gjovalin Loka, Zv/drejtori për Rendin në DVP Tiranë Dhimitraq Ziu, drejtues të tjerë të lartë të Policisë, kolegë, miq e të afërm.

Ndryshe, punonjësja e policisë, Ina Nuka mbeti e plagosur nga një kapsollë gjatë protestës më 22 Nëntor para Parlamentit, dhe u dërgua për trajtim mjekësor të specializuar në Ankara të Turqisë