“Babalja”, PD: Të merret i pandehur Taulant Balla

Partia Demokratike përmes Sekretarit për Çështjet Ligjore në PD, Çlirim Gjata, ka akuzuar Prokurorinë e Krimeve të Rënda dhe Prokurorinë e Tiranës, se si seksion i rilindjes janë vënë në shërbim të qeverisë Rama, për të fshehur përgjime në lidhje me dosjen “Babale”.

“Dje Partia Demokratike publikoi përgjime zyrtare se si gjithë shteti ishte vendosur në shërbim dhe komandohej dhe urdhërohej nga një trafikant i dënuar si Alfred Alizoti, vetëm sepse ky personazh mori përsipër rolin e dëshmitarit të rremë për të shpëtuar trafikantin Geron Xhafaj dhe pushtetin politik të Edi Ramës.

Përgjimet zyrtare të Prokurorisë faktojnë përdorimin si seksion i rilindjes të Prokurorisë së Krimeve të rënda dhe prokurorisë së Tiranës. 4 Prokurorë u përdorën politikisht për të shpëtuar nga dënimi trafikantin e drogës Geron Xhafaj dhe vëllain e tij ministër të Brendshëm.”

Pas publikimeve të përgjimeve zyrtare, Sekretari për Çështjet Ligjore në PD vlerëson se Prokuroria duhet të merrte të pandehur, Taulant Ballën, Fatmir Xhafajn, Ard Veliun, Albert Nushin dhe një sërë strukturash policore që kanë shërbyer për manipulimin e ngjarjes me qëllim shpëtimin e pushtetit të Ramës dhe dënimin e opozitës që denoncoi aferën.

“Përgjimet zyrtare të Prokurorisë faktojnë se pushteti kriminal i Edi Ramës e sajoi dëshmitarin e rremë dhe e pagoi atë për të shpëtuar veten dhe për ta përdorur kundër opozitës. Përgjimet faktojnë që prokuroria, në shkelje të ligjit, nuk ka zbardhur disa përgjime, ku dëshmitari i sajuar flet për Taulant Ballën dhe Drejtorinë e Përgjithshëm të Policisë së Shtetit,” thekson Sekretarit për Çështjet Ligjore në PD, Çlirim Gjata duke përfunduar:

“Përgjimet faktojnë se me Edi Ramën, pushtetin real e kanë kriminelët, se Drejtori i Policisë së Fierit është një shërbëtor i dëshmitarit të rremë dhe që detyrohet ta mbajë me para për të sajuar kundër opozitës.”