Bilanc lufte/ Vera e nxehtë në Francë, 1.435 të vdekur

Vala rekorde e të nxehtit në Francë, e regjistruar në muajt qershor dhe korrik, la 1.435 të vdekur, tha ministrja e Shëndetësisë, Agnes Buzyn.

Gjysma e viktimave kanë qenë mbi 75 vjeç, tha Buzyn për Radio Francën, duke shtuar se falë masave parandaluese, norma ka qenë dhjetë herë më e ulët se në periudhën e njëjtë në vitin 2003, kur Evropa është përfshirë nga një tjetër valë vdekjeprurëse e të nxehtit.

Franca shënoi temperaturën prej 46 gradësh Celsius në qershor, që është më e larta në historinë e saj.

Në Paris po ashtu u shënua temperaturë rekorde prej 42.6 gradësh Celsius në korrik.

Sipas Ministrisë së Shëndetësisë, 567 persona vdiqën në periudhën 24 qershor – 7 korrik, ndërsa 868 të tjerë vdiqën nga 21 deri më 27 korrik.

Gjatë periudhave të nxehta, shumë shkolla u mbyllën dhe disa ngjarje publike u anuluan, për të minimizuar ekspozimin e publikut, raporton RFE.

Ndryshe, temperaturat e larta thyen rekorde sivjet edhe në vende të tjera të Evropës, duke përfshirë Mbretërinë e Bashkuar, Belgjikën, Gjermaninë, Luksemburgun dhe Holandën.