LDK kërkon zotim nga Lëvizja Vetëvendosje për postin e Presidentit
Sot nuk do të takohen Kryetari i Lëvizjes Vetëvendosje, Albin Kurti dhe ai i LDK-së, Isa Mustafa. Kështu ka bërë të ditur vetë kreu i Vetëvendosjes, Albin Kurti. Në anën tjetër, LDK vazhdon me kërkesën e saj që në marrëveshjen me Lëvizjen Vetëvendosje të futet edhe posti i presidentit, madje kërkon edhe zotim.
Kryetari i Lëvizjes Vetëvendosje, Albin Kurti tha se takim nuk do zhvillohet sot, por që paralajmëroi takime të shpeshta deri në arritjen e marrëveshjes. Ai tha se ende nuk ka rezultate konkrete në drejtim të nënshkrimit të koalicionit qeverisës me LDK-në.
I pyetur se thirrja e seancës konstituive të Parlamentit nga Presidenti i Kosovës, Hashim Thaçi a paraqet presion për arritjen e koalicionit, Kurti tha presidenti u ka ofruar edhe më shumë kohë sesa që nevojitet.
Sipas tij në takimin e mbrëmshëm me liderin e LDK-së, Isa Mustafa, janë pajtuar që të vazhdojnë takimet e radhës për të arritur marrëveshjen finale për formimin e Qeverisë së re të vendit.
Kreu i Vetëvendosjes e ka përsëritur se fitues i zgjedhjeve të 6 tetorit nuk sheh partner tjetër në koalicionin qeverisës përveç LDK-së.
Optimist se koalicioni do të ndodhë së shpejti është shprehur edhe Haxhi Avdyli nga Lidhja Demokratike e Kosovës, i cili tha se marrëveshja do të arrihet pa i kaluar afatet kushtetuese.
Avdyli tha se njëra nga çështjet që kanë mbetur pa u zgjidhur është edhe ajo e presidentit, për çka në këtë pikë Vetëvendosje kërkon një zotim për bashkëpunimin e ardhshëm.
Ish-deputeti i LDK-së ka insistuar që posti i presidentit të jetë çështje që duhet të diskutohet nëse Lëvizja Vetëvendosje dëshiron të ketë partneritet me LDK-në.
Haxhi Avdyli tha se LDK është gjithmonë e gatshme për zgjedhje, por nuk janë të interesuar që vendi të shkojë në zgjedhje pasi në këtë mënyrë bllokohet vendi.
Presidenti Hashim Thaçi ka thirrur seancën konstituive të legjislaturës së shtatë të Kuvendit më 24 dhjetor, në orën 9:00.
Lideri i Lëvizjes Vetëvendosje, Albin Kurti pati premtuar që marrëveshja të mbërrihej 72 orë pas certifikimit të rezultatit të zgjedhjeve të 6 tetorit, të cilat u certifikuan më 27 nëntor.
