Marrëveshje me komunitetet ortodoks dhe hebre, DPA: Dixhitalizim për të gjitha dokumentet!

Drejtoria e Përgjithshme e Arkivave, DPA nënshkroi sot marrëveshje bashkëpunimi me dy komunitete fetare, Kishën Ortodokse Autoqefale të Shqipërisë si dhe Rabinatin e Shqipërisë për kryerjen e procesit të digjitalizimit të fondeve arkivore dhe të çdo materiali tjetër që është krijuar nga dy komunitetet, e që ruhen në AQSH.

Marrëveshja për digjitalizimin e dokumenteve arkivore të Komunitetit Ortodoks dhe institucioneve të tij që ndodhen në AQSH u nënshkrua nga Drejtori i Përgjithshëm i Arkivave, Dr.Ardit Bido dhe përfaqësuesi i Kishës Orthodokse Autoqefale të Shqipërisë, Episkop Asti.

Drejtori i Përgjithshëm i Arkivave informoi përfaqësuesit e KOASH mbi marrëveshjet e tjera me komunitetet fetare ndërsa Hirësi Asti vlerësoi marrëveshjen si një hap të rëndësishëm për të dy institucionet.

Ndërkaq, Rabinati Shqiptar u përfaqësua nga kryerabini i Shqipërisë, Yoel Kaplan. Marrëveshja parashikon digjitalizimin e të gjithë fondit arkivor të personave dhe organizmave të hebrenjve në Arkivin Qendror Shtetëror, me kostot e Rabinatit, si dhe do të bashkëveprojnë për botimin e katalogjeve të referencave arkivore mbi hebrenjtë në Shqipëri.

Drejtori i Përgjithshëm i Arkivave, Dr. Ardit Bido vlerësoi Marrëveshjen si tentativën e radhës për të bërë publike në të gjithë botën historinë krenare të kombit shqiptar në shpëtim të hebrenjve.

Kjo Marrëveshje, tha Dr.Ardit Bido, do të mundësojë edhe një platformë elektronike për ta përbotësuar këtë ngjarje të rëndësishme në historinë e dy kombeve. Kryerabini Yoel Kaplan vlerësoi me këtë rast rolin e shqiptarëve në shpëtimin e hebrenjve dhe theksoi se marrëveshja me DPA do t’i japë një hov të ri kërkimit shkencor mbi këtë moment të rëndësishëm historik.

Ndryshe, me këto dy Marrëveshje përmbyllet edhe dixhitalizimi i fondeve arkivore të komuniteteve fetare në Shqipëri.