Pas vitit 2014, Kurti: Padrejtësia e II-të

Kryeministri në detyrë i Kosovës, Albin Kurti tha se po synohet të formohet një qeveri pa fituesin e zgjedhjeve dhe kundër fituesit ndërsa kujtoi se në vitin 2014 kanë konsideruar që shumica parlamentare formohet në Parlament por që këtë e kishte rrëzuar një Aktgjykim i Gjykatës Kushtetuese, me të cilin Kurti tha se janë pajtuar.

“Ne ishim në vitin 2014 mirëpo atëherë na thanë se e kemi gabim, se paska shumicë relative, se i pari në garë qenka shumicë relative, ne e pranuam. Tash fituam, e tash po thonë ejani të kthehemi në vitin 2014. Ndryshuan rregullat e lojën me aktgjykim të Gjykatës Kushtetuese në sistemin tonë institucional, ne i pranuam ato e tash po thonë le të kthehemi atje në vitin 2014 që është padrejtësi e dyfishtë. Edhe në vitin 2014 na bëhej e padrejtë e po na bëhet edhe sot sepse po synohet një qeveri jo vetëm pa fituesin, por edhe kundër fituesit dhe një qeveri e cila për herë të parë në Kosovën e pavarur nuk varej as nga Lista Serbe e as nga PAN-i,” tha Albin Kurti duke shtuar se me tejkalimin e kompetencave të presidentit i cili po dëshiron të formojë vullnet politik që nuk është në mandatin e tij edhe me varësi prej Listes Serbe edhe me varësi prej PAN-it.

Lidhur me kandidatin e nominuar për Kryeministër të ri nga LDK, kryeministri Albin Kurti tha se vlerësimet për këto ngjarje do t’i japin kur t’i shohin dokumentet zyrtare të nënshkruara.

Këto komente Kryeministri Albin Kurti, në një konferencë për media ku bëri të ditur se ka pranuar dorëheqjen e Nenad Rashiçit nga posti i këshilltarit të tij për komunitete, pasi ndaj tij është ngritur aktakuzë, që sipas Kryeministrit është ngritur ngga regjimi i vjetër i shtetit të kapur.