Nderimi i terroristëve është pjesëmarrje në krim!

nga Nebil Çika*

Presidenti Ilir Meta i dha Luan Omarit Dekoratën e lartë shtetërore “Gjergj Kastrioti Skënderbeu”, me motivacionin: “Në vlerësim të kontributit të tij të spikatur në historinë e mendimit juridik, kushtetues dhe pedagogjik të vendit. Për meritat e shquara si bashkëthemelues i institucioneve më të larta të sistemit arsimor e shkencor në Shqipëri, Universitetit të Tiranës dhe Akademisë së Shkencave; një ndër konstitucionalistët kryesorë me ndikim të ndjeshëm në proceset thelbësore të ligjvënies në Shqipëri. Si përfaqësues i denjë i botës akademike shqiptare në organizatat shkencore dhe forumet e së drejtës ndërkombëtare, duke spikatur me personalitetin e tij akademik”.

Nderimi i Luan Omarit nga Ilir Meta është pa dyshim një akt i turpshëm e kriminal pasi presoni në fjalë ka qenë një aga autorët e legjislacionit terrorist të diktaturës komuniste të drejtuar nga daja i tij Enver Hoxha.

Luan Omari ka përgjegjësi për shumë krime të rënda kushtetuese por kryevepra e tij kriminale është pa dyshim Kushtetuat komuniste e vitit 1976 në hartimin e të cilës ai ka rrol kryesor.

Kujtojmë që pikërisht kjo kushtetutë sanksionoi me ligj diktaturën më të egër që kishte parë ndonjë herë bota deri në atë kohë .

Shpalli Shqipërinë diktaturë!

Ndaloi me ligj besimin ne Zot!

Ndaloi me ligj pronën private!

Sanksionoi më ligj rolin udhëheqës të PPSH dhe sistemin një partiak në Shqipëri.

Ndaloi me ligj të drejtat e fjalës, lëvizjes, zgjedhjes, arsimit etj.

Me pak fjalë dhunoi me ligj çdo të drejtë themelore të njeriut në Shqipëri dhe ligjëroi terrorizmin shtetëror, vrasjet, burgimet, internimet, qindra mijëra shqiptarëve të pafajshëm. Jo se këto nuk ndodhën më parë por deri në vitin 1976 shumica e krimeve të komunizmit, si ndalimi i besimit në Zot , pronës private etj. kryheshin pa u mbështetur në ligj, pasi kushtetuta e më parshme nuk i parashikonte ato.

Dje, Ilir Meta ka dekoruar terroristin, shërbëtorin më besnik e me djallëzor të kryeterroristit Enver Hoxha.

Vlera e dekoratave është që personat që i marrin ato, të bëhen model për qytetarët e tjerë dhe brezat e ardhshëm.

Po a mund të jetë model Luan Omari?!

Sigurisht që jo, dhe jo vetëm si profesionist por edhe si njeri ai është modeli i terroristit politik. Asgjë nga ato me të cilat presidenti motivoi dekorimin e Omarit, nuk meriton vlerësim, përkundrazi duhen dënuar si veprimtari terroriste, krime kundër njerizimit dhe gjenocid ndaj popullit Shqiptar.

Çdo krim politik i ndodhur në Shqipëri sidomos pas vitit 1976 e ka “bazën ligjore” të kushtetutës që Omari bëri për llogari të dajës së tij kriminel, dhe nuk ka bashkëpunim më të madh në krime se sa përgatitja e kushteve për kryerjen dhe justifikimin e tyre.

Si njeri ai nuk meriton pikë respekti pasi midis dajës terrorist dhe të atit viktimë e këtij vrasësi, ai zgjodhi dajën.

Ai nuk ka reflektuar për asnjë moment nga bashkëpunimi i tij në krime me Enver Hoxhën, qëndrim që e mban edhe sot në ditën e dekorimit nga Meta.

Dy vjet më parë, në një ceremoni të përkujtimit në Kampin komunist të shfarosjes në Tepelenë i kam kërkuar Presidentit Meta të heq dorë nga praktika e nderimit edhe të viktimave edhe të xhelatëve, praktikë e politike të cilën ai e vazhdon, dhe rasti i Omarit është një nga me flagrantët.

Është me shume se hipokrizi, është pjesëmarrje në krim, të nderosh autorët e krimeve kundër njerizimit dhe gjenocidit pasi je betuar mbi kushtetutën që i dënon ato.

I kujtoj z.President që këto krime edhe nuk parashkruhen!

*Kryetar i Shoqatës Antikomuniste të Përndjekurve Politikë të Shqipërisë