Me sipërmarrësit e vegjël, Basha: Qeveri e re për shqiptarët, jo oligarkët!

Pas takimit me banorët, sipërmarrësit e vegjël dhe fermerët në zonën e Saukut dhe Baldushkut, Kryetari i Partisë Demokratike, Lulzim Basha, konstaton se papunësia është rritur, fuqia blerëse ka rënë, çmimet janë rritur e për qytetarët po bëhet gjithnjë e më e veshtirë mbijetesa.

“Çdo ditë që kalon, kriza ekonomike thellohet, pamundësia për të përballuar jetën shtohet, ndërsa njeriu përgjegjës për këtë situatë harxhon orë të tëra në ekran duke folur për gjithçka përveçse për hallet e qytetarëve,” thekson Lulzim Basha dhe në këto ditë të vështira, paratë që duhet të shkonin për qytetarët, për biznesin e ndershëm, për të mbështetur fermerët prodhimet e të cilëve u prishën, shkojnë për tendera e PPP korruptive.

“Taksat e rritura si në asnjë vend tjetër në rajon mbushin xhepat e oligarkëve dhe qeveritarëve që i ndajnë bashkë me njëri-tjetrin,” tha lideri i opozitës duke vlerësuar se në këto 7 vjet virusi më shkatërrimtar për qytetarët dhe ekonominë është Ramavirusi.

“Nuk ka asgjë më të rëndësishme për një qeveri të përgjegjshme se ekonomia, nuk ka asgjë më prioritare se t’iu krijojë mundësi qytetarëve të punojnë dhe të jetojnë me dinjitet,” tha Kryetari i Partisë Demokratike Lulzim Basha në takim me sipërmarrësit e vegjës dhe fermerët e Saukut dhe Baldushkut duke ju bërë të qartë se PD ka një plan me të cilin do të mbështesin biznesin përmes krijimit të lehtësive fiskale dhe do të ndalojmë bandën e taksidarëve t’iu bëjë presion për rryshfetin e radhës.

“Ne do të akordojmë subvencione që do të shkojnë si mbështetje direkt tek fermerët në varësi të prodhimit të tyre. Do të heqim taksën “Rama” mbi naftën dhe si çdo qeveri tjetër e përgjegjshme në Europë do t’iu garantojmë shqiptarëve përmbushjen e nevojave minimale për jetën dhe arsimin për fëmijët,” tha Kryetari i Partisë Demokratike, Lulzim Basha, duke shtuar se asnjë fëmijë, nxënës apo student nuk do të mbetet pa shkollë për shkak të pamundësisë ekonomike ndërsa përfundoi:

“Ne do të ndërtojmë një qeverisje normale, që do të punojë për shqiptarët dhe jo për një grusht oligarkësh.”