Risi nga DPA, salla studimi në çdo cep të Shqipërisë dhe hapësirën shqiptare
Drejtoria e Përgjithshme të Arkivave sjellë risi për Gjirokastrën në Bibliotekën “Apostol Meksi”, e që i mundëson komunitetit shkencor të qytetit dhe rrethinave të kenë qasje të plotë dhe të njëllojtë me sallën e studimit të DPA në Tiranë.
“Në Bibliotekën e qytetit të Gjirokastrës u krijua këndi arkivor i Drejtorisë së Përgjithshme të Arkivave, për të qenë më afër qytetarëve dhe studiuesve. Kjo do të mundësojë që elita intelektuale e qytetit, përmes sistemeve elektronike të vendosura në dispozicion, të mund të ketë qasje në dokumentin arkivor, si të ishte në Tiranë, pa pasur nevojën e udhëtimit drejt kryeqytetit,” thekson DPA duke saktësuar se qëllimi i kësaj është që të nxitet kërkimi shkencor në Gjirokastër dhe të rrisë frekuentimin në bibliotekën e vet.
Shërbimi për studiuesit do të ofrohet me të njëjtat rregulla, të njëjtat procedura, të njëjtën shpejtësi dhe të njëjtën formë siç ofrohet në Sallën e Studimit të Drejtorisë së Përgjithshme të Arkivave në Tiranë.
“Regjistrimi në Sallën e Studimit kryhet përmes internetit, jashtë këtij Këndi Arkivor, në adresën katalogu.arkiva.gov.al. Pas aprovimit, që zgjat një ditë pune, aplikuesi përmes e-mailit do të pajiset me fjalëkalimin për të hyrë në Sallën e Studimit. Pasi të jetë bërë ky regjistrim, qytetari dhe studiuesi mund të porosisë dosjet që dëshiron, ta konsultojë, si në këtë Kënd Arkivor, po ashtu edhe në adresën katalogu.arkiva.gov.al.” thekson Drejtoria e Përgjithshme të Arkivave duke shtuar se dosjet e porositura do të shërbehen ditën që është përzgjedhur nga aplikuesi në sistem dhe do të qëndrojnë të qasshme për pesë ditë pune ndërsa përfundon:
“E nisëm këtë risi të DPA-së në qytetin e Gjirokastrës për të vazhduar shumë shpejt dhe në të gjitha qytetet e tjera të Shqipërisë, në Kosovë dhe në Maqedoninë e Veriut.”
Ndryshe, në përurimin e këtijë shërbimi të ri ishin të pranishëm Drejtori i Përgjithshëm i DPA, Ardit Bido, deputeti i zonës dhe Ministri i Bujqësisë, Bledi Çuçi, Prefekti i qarkut Gjirokastër Odise Kote, kryebashkiaku Flamur Golemi, përgjegjësja e Bibliotekës Arminda Mevlani dhe pedagogu Shyqyri Hysi.
