Fshehin numrin e të vdekurve: Në Beograd, numri i varrimeve është rritur 80%
Shteti serb nuk është kriminal vetëm ndaj të vdekurve joserb, varret e të cilëve i fsheh edhe 20 vjet pas përfundimit të luftërave në Ish-Jugosllavi, por këtë gjë e bënë edhe me shtetasit e vetë serb. Vdekjet nga koronavirusi çdo ditë e më shumë janë në rritje, dhe kjo konfirmohet si nga numri i varrimeve ashtu dhe numri i të vdekurve nga e njëjta periudhë e vitit të kaluar.
Kështu, vetëm numri i varrimeve në Beograd, në muajin nëntor është rritur për 40 për qind, e në muajin dhjetor 80 për qind, në krahasim me të njëjtën periudhë të vitit të kaluar, shkruan e përditshme serbe “Nova”, dhe duke ju referuar grafikut nga faqja umrlice.net, ku publikohen të dhënat mbi varrimet në Beograd, në muajin nëntor dhe dhjetor në kryeqytetin serb kishte më shumë se 1.000 varrime në muaj.
Mirëpo këtë vit, në muajin nëntor në varrezat e Beogradit janë varrosur 1.399 persona ndërsa për 26 ditët e dhjetorit 1.803.
Edhe të dhënat nga ndërmarrja komunale JKP “Pogrebne usluge” /lexo shqip: Shërbimet funerale/ dëshmojnë se në 10 varrezat më të mëdha të Beogradit prej 1-16 Dhjetor janë varrosur 1.080 njerëz, ku nga gjysma e muajit u tejkalua numri 1.068 që u shënua gjatë muajit dhjetor të vitit 2019.
Sipas faqes umrlice.net, të dhënat tregojnë se javën e kaluar në Beograd kishte mbi 60 varrime në ditë. Kështu të mërkurën, 23 Dhjetor, kishte 66, të enjten 67, të premten 70. Që numri i të vdekurve është shumë i madh flet edhe fakti se në Beograd ka varrime edhe të dielën, që nuk është praktikë ndër ortodoksët serbë. Në varrezat e Bezhanisë, njëra ndër më të mëdhatë në Beograd, familja e një të vdekuri, të hënën ka arritur të marrë një orar për varrim vetëm pas gjashtë ditësh, përkatësisht të dielën!
Është e qartë që të gjithë të varrosurit në Beograd nuk kanë vdekur nga COVID-19, ashtu si dhe të gjithë të vdekurit brenda një dite në Serbi, siç deklarohen zyrtarisht rreth 50 për muajin e kaluar, nuk janë varrosur në kryeqytetin serb.
Mirëpo, edhe numri aktual, rreth 50 në ditë nga koronavirusi në Serbi, ka hapur shumë debate në opinionin publik rreth statistikave zyrtare. Kështu, Kryetari i Sindikatës së mjekëve dhe farmacistëve të Serbisë si dhe tha anëtar i Këshillit kundër Covidit, Dr. Rade Paniç tha se është i bindur se në Serbi po fshehin të dhënat për të vdekurit nga COVID-19 ndërsa mori shembullin e Spitalit të Kralevës, ku vetëm gjatë një turni kanë vdekur pesë pacientë në shërbimin intensiv, duke mos llogaritur repartin, e zyrtarisht është publikuar se në Kralevë atë ditë kanë vdekur 3 persona.
“Në vend se në konstatimin e vdekjes të shënohet si shkaktar Covidi, ata shënojnë pneumoninë e thjeshtë ose ndonjërën prej sëmundjeve shoqëruese që ka pasur pacienti,” tha Paniç.
Dyshimin për statistikën zyrtare mbi të vdekurit nga koronavirusi, disa herë e ka shprehur profesori Zoran Radovanoviç, i cili ka vlerësuar se në pyetje është mashtrimi më i madh, siç tha ai, në 800 vjet të historisë së mjekësisë serbe.
“Nuk ka rëndësi se për sa qindra mijëra është rritur numri i testeve të kryera PCR, dhe nëse është ulur për tri ose katër herë numri të vdekurve real nga kjo sëmundje. Thelbi është se po përbuzet inteligjenca e këtij populli dhe se pushteti zyrtarisht po nënshtron gënjeshtrën si të drejtën e saj, me mesazhin e pafshehur që dyshuesit do të dënohen siç është me shkarkim nga posti, humbje të vendit të punës, fyerje dhe përçmim,” tha Radovanoviç.
Edhe të dhënat nga Enti republikan i Statistikave tregon një rritje të dukshme të vdekshmërisë, ku nga 1 Prilli deri në 31 Tetor 20202, në Serbi kanë vdekur 4.011 persona më shumë se në të njëjtën periudhë të vitit të kaluar, përkatësisht 3.727 më shumë në krahasim me mesataren e 10 viteve të fundit.
Diferenca më e madhe e numrit të vdekurve në krahasim me vitin 2019 është shënuar në muajin korrik, kur u shënuan 1.701 të vdekur më shumë se në të njejtën periudhë të vitit të kaluar.
Ndryshe, për këtë vit, Enti republikan Statistikave publikon të dhënat për vdekshmërinë më 25 Janar të vitit 2021.
