“Drejtësi dhe Liri”, policia përplaset me protestuesit në Shkup
Me moton “Drejtësi dhe Liri”, filloi në Shkup protesta kundër vendimit të Gjykatës Penale për rastin “Monstra” e cila shumë shpejtë u përballë me policinë maqedone ndonëse ishte një protestë e paralajmëruar nga ana e familjarëve të personave të akuzuar.
Fillimisht protestuesit u grumbulluan në Çair dhe vazhduan rrugën drejtë Gjykatës dhe më pas edhe Qeverisë duke borohoritur “Pa drejtësi s’ka liri”., “Bashkohuni me ne”, “Poshtë tradhtarët-liri popullit”.
Por marshi i protestuesve u ndalua tek Mavrovasja, raporton Alsat, pasi ka hasur në një kordon të policisë. Organizatorët i bënë thirrje policisë për hapjen e rrugës ndërsa protestuesve për qetësi dhe maturi që të mos bien pre e provokimeve që nuk po pushonin nga ana e policisë.
Organizatori i protestës, Bedri Ajdari, iu drejtua policëve për hapje të rrugës duke iu ofruar edhe dokumentin me të cilin kanë paralajmëruar protestën e sotme ndërsa sqaroi se qëllimi i protestuesve është që të arrijnë para qeverisë, të mbajnë fjalimin e paraparë dhe të shpërndahen në mënyrë të qetë dhe demokratike.
“Përmes incidenteve dëshirojnë të fshehin dështimet e tyre, andaj ju lus për maturi. Ju mund ta na i bllokoni rrugën këtu, por jo edhe ato të Evropës dhe botës. Asnjë proces nuk e keni fituar në Strasburg, gjithmonë keni qenë humbës,” tha Ajdari duke shtuar:
“Vuajtjet e shqiptarëve në këtë vend nuk kanë të ndalur, këto vuajtje po i përjeton familja ime dhe shumë familje tjera. Kishim shpresë që vuajtjet tona do të ndalen dhe drejtësia do të vij në vend edhe për të vrarët edhe për të burgosurit. Por kur janë në pyetje shqiptarët aktakuzat vlejnë për të na dëmtuar me dënime kapitale, me burg të përjetshëm. Nuk pritej që Qeveria Zaev ta shuaj shpresën për drejtësi. Ne me kokën lart dalim para popullit dhe themi se jemi krenar me familjarët tonë dhe se ato nuk janë fajtor, por faji i vetëm i tyre është sepse janë shqiptar,” tha Bedri Ajdari i cili i bëri thirrje edhe ndërkombëtarëve që të përfshihen në këtë proces për të zbardhur të vërtetën.
Gjithsesi dhuna policore nuk prodhoi asgjë të mirë edhe në këtë rast. Shtatë policë të lënduar dhe 8 shoqëruar në polici është bilanci i protestave të sotme për rastin “Monstra”, konfirmojnë nga Ministria e Punëve të Brendshme të Maqedonisë së Veriut dhe janë organizatorët enprotestave dhe deputetët shqiptarë nē protestë që qetësuan protestuesit.
Protestës për rastin “Monstra”, iu bashkëngjiten edhe familjarët e Almir Aliut, vogëlushit nga Kumanova, për rastin e të cilit të hënën në Kumanovë protestuan dhe kërkuan rigjykim të rastit, dëmshpërblim si dhe lirimin nga akuza të tre familjarëve të Almirit.
Ndërkohë protestës iu bashkëngjitën edhe disa deputetë të opozitës.
Ndryshe, për rastin “Monstra”, Alil Demiri, Afrim dhe Agim Ismailoviç u dënuan me burgim të përjetshëm për vrasjen e pesëfishtë në Smillkovë. Haki dhe Fejzi Aziri u dënuan me nëntë, respektivisht 15 vjet burg. Gjykata Penale i shpalli ata fajtorë për veprat penale terrorizëm, respektivisht, për ndihmë.
