Pas takimit, Basha: Rinia, motorri i ndryshimit të Shqipërisë më 25 Prill

Pas takimit me të rinjtë dhe përfaqësuesit e “European Democrat Students”, Kryetari i Partisë Demokratike, Lulzim Basha, tha se vendosmëria dhe përkrahja e të rinjëve është motorri i Aleancës mbarëqytetare për ta ndryshuar Shqipërinë më 25 prill.

“Ndava me të rinjtë në sallë dhe me të tjerë virtualisht, shqetësimin se Shqipëria ka mbetur në vendnumëro me Edi Ramën. Ai ka dështuar në çdo fushë dhe nuk mund ta nxjerrë vendin nga kolapsi ku e ka zhytur. 75% e të rinjve shqiptarë duan të largohen nga vendi, ndërsa 94% e atyre që studiojnë jashtë nuk duan të kthehen,” tha Lulzim Basha duke shtuar se Edi Rama hartoi ligjin për arsimin e lartë për t’i nënshtruar studentët, pedagogët dhe universitetet shqiptare ndërsa siguroi të rinjtë:

“U angazhova edhe një herë para studentëve, se pas 25 prillit ne do ta abrogojmë këtë ligj dhe do të shkruajmë bashkë me ta një ligj të ri që garanton autonominë universitare dhe cilësinë e arsimimit të tyre.”

Risolla përpara të rinjve angazhimin për të mos lënë asnjeri pa studiuar për shkak të pamundësive ekonomike, tha Kryetari i PD ndërsa saktësoi:

“Studentët nga familjet me të ardhura nën 640 mijë lekë të vjetra/muaj do të përfitojnë 100% financim të tarifave të studimit, ndërsa të tjerët 50%. Angazhimi tjetër i rëndësishëm është për 10 mijë stazhe të paguara. 300 mijë lekë në muaj çdo vit për studentët tanë më të mirë. Unë jam i bindur se të rinjtë dhe të rejat sot janë shumë të ngjashëm me rininë europiane.”

Rinia shqiptare është zemra e projektit tonë për të sjellë ndryshimin dhe shpresën, tha Kryetari i Partisë Demokratike, Lulzim Basha, duke u bërë thirrje të rinjve dhe të rejave të pranishme që të bashkojmë shpresat dhe energjitë, dhe ta përcjellim frymëzimin derë më derë, ndërsa përfundoi:

“Të gjithë bashkë mund ta bëjmë Shqipërinë si Europa. Me këtë bashkim të madh shqiptarësh dhe shqiptaresh të reja, jam i bindur se më 25 prill, Rama do të humbë dhe rinia shqiptare do të fitojë, Shqipëria europiane do të fitojë.”