Fillon vaksinimi në Klinikën Infektive në QKUK

Në Klinikën Infektive në Qendrën Klinike Universitare të Kosovës, QKUK, ka filluar vaksinimi kundër COVID-19.

I pari që u vaksinua ishte infermieri në Klinikën Infektive, Osman Ismaili, e pas tij u vaksinua ushtruesi i detyrës së Drejtorit të Klinikës Infektive, Izet Sadiku.

Vaksinën Anticovid e mori edhe kryetari i Shoqatës së Infermiereve të Kosovës, Fitim Havolli.

Ndërkohë në Qendrën e Vaksinimit në sallën 1 Tetori në Prishtinë nga mëngjesi ka filluar imunizimi i profesionistëve shëndetësorë të kujdesit primar. Sipasit Koordinatorit të kësaj qendre, Niman Bardhi, krahas profesionistëve shëndetësor me 24 mijë vaksinat e dhuruara nga COVAX do të vaksinohen edhe personat e moshës mbi 80 vjeç

Ndryshe, qytetari i parë i Kosovës i cili u vaksinua ishte Kryeministri Albin Kurti.

Pas marrjes së vaksinës Anticovid, Albin Kurti tha se se nuk ka dashur ta shfrytëzojë privilegjin si Kryeministër për tu vaksinuar i pari, por t’i inkurajojë edhe qytetarët tjerë që të vaksinohen dhe të heqin dilemat për vaksinat.

“Si kryeministër nuk jam këtu që ta shfrytëzojë privilegjin që të vaksinohem por të inkurajojë të gjithë qytetarët të vaksinohen meqenëse mbrëmë ka ardhur kontingjenti i parë i vaksinave, do të kemi edhe vaksina tjera dhe do të përpiqemi maksimalisht që sa më shpejtë dhe sa më shumë qytetarë të vaksinojmë. Me shembullin tim dua t’i inkurajojë të gjithë qytetarët të vaksinohen dhe të heqin dilemat. Vaksinimi është i nevojshëm, po përballemi me një pandemi të vështirë dhe zgjidhja përfundimtare është vaksinimi i popullsisë,” tha dje Albin Kurti duke shtuar se do të vazhdohet me vaksinimin e personelit shëndetësorë, me të moshuarit e pastaj qytetarët tjerë.