Tusk në Prishtinë, tani liberalizimi i vizave për Kosovën është më afër

Presidenti i Këshillit Evropian, Donald Tusk pas takimit me Presidentin e Kosovës, Hashim Thaçi në Prishtinë, tha se Bashkimi Evropian duhet ta dëshmojë mbështetjen e palëkundur për perspektivën evropiane të rajonit, mbështetje e cila do të shprehet në Samitin e Sofjes, që do ta mbahet me 17 maj, thekson DW.

“BE duhet të dëshmojë mbështetjen e palëkundur për perspektivën e rajonit. BE është dhe do të vazhdojë të jetë partneri më i besueshëm për tërë rajonin. Samiti duhet të përmirësojë lidhjet brenda rajonit. Ne do ta përdorim samitin për të diskutuar se si do t’i trajtojmë disa sfida të përbashkëta të sigurisë”, tha Donald Tusk, duke i kushtuar një rëndësi të veçantë dialogut Kosovë-Serbi.

“Pa normalizim gjithëpërfshirës dhe pa zbatimin e plotë te marrëveshjeve të arritura në dialog, nuk shoh se si mund të bëhet një ndryshim dhe përmirësim i marrëdhënieve Kosovë-Serbi,” tha ai duke shtuar se pas takimit që zhvillova me herët me presidentin e Serbisë dhe tani me presidentin e Kosovës jam optimist

“Liberalizimi i vizave për Kosovën është më afër pas ratifikimit të demarkacionit me Malin e Zi”, tha Tusk, sipas të cilit lufta kundër krimit të organizuar dhe korrupsionit duhet të vazhdojë megjithë arritjet.

“Luftimi i krimit të organizuar dhe korrupsionit kërkon konsensus politik dhe Brukseli i çmon arritjet e Kosovës në këtë drejtim”, tha Presidenti i Këshillit Evropian, Donald Tusk.

Presidenti i Kosovës, Hashim Thaçi nga ana e tij tha se Kosova është faktor konstruktiv në rajon dhe sipas tij, rajoni i Ballkanit përfshirë këtu edhe Kosovën nuk kanë qenë kurrë më afër njëri tjetrit.

“Bashkimi Evropian dhe shtetet e Ballkanit Perëndimor e kanë kuptuar se bashkërisht mund të bëjmë shumë më shumë që sa më shpejt të realizojmë në praktikë, atë çfarë BE-ja e ka riaktualizuar në mënyrë të qartë përsëri, 15 vite më vonë nga Samiti i Selanikut që është anëtarësimin e të gjitha shteteve të Ballkanit Perëndimor në BE”, tha Presidenti Thaçi duke shtuar se Kosova ka një nevojë urgjente për të përshpejtuar hapat e saj drejt anëtarësimit në BE. “Kosova reflekton mbështetje qytetare ndaj BE-së, mirëpo Kosova ka nevojë për konkretizim të perspektivës evropiane dhe ambicia jonë minimale është që në një periudhe sa më të shkurtër të marrim statusin e vendit kandidat për anëtarësim në BE”, tha Presidenti Thaçi, duke shprehur edhe njëherë përkushtimin e Kosovës në procesin e dialogut me Serbinë dhe ndihmën gjermane në këtë proces.

“Dialogu për normalizimin e marrëdhënieve ndërshtetërore ndërmjet Kosovës dhe Serbisë do të jetë një nga çështjet më të rëndësishme që do të diskutoj edhe në Berlin, në takimin me kancelaren gjermane, Angela Merkel”, tha Presidenti Thaçi.

Donald Tusk vizitoi Prishtinën në kuadër të një vizite kordinuese me vendet e rajonit, të cilat do të marrin pjesë në Samitin e Sofjes.

Kosova merr pjesë në Samitin e BE-së për Ballkanin Perëndimor, që do ta mbahet më 17 maj në Sofje të Bullgarisë, ndonëse pesë vende të BE-së akoma nuk e njohin si shtet të pavarur.