Berisha: Shqipëria ka nevojë urgjente për vendosjen e minimumit jetik dhe heqjen e TVSH-së për ushqimet bazë

Pas të dhënave të fundit të Organizatës së Kombeve të Bashkuara për Ushqimin dhe Bujqësinë, FAO, që konfirmojnë se rreth 31.8 për qind e shqiptarëve përballen me pasiguri ushqimore të moderuar ose të rëndë në periudhën 2023-2025 derisa mesatarja e Bashkimit Evropian është 7.4 për qind, ka reaguar Kryetari i Partisë Demokratike, Sali Berisha, duke theksuar se Shqipëria ka nevojë urgjente për vendosjen e minimumit jetik dhe heqjen e TVSH-së për ushqimet bazë.

Konferencën e sotme për media Kryetari i Partisë Demokratike e filloi duke komentuar spektaklet qeveritare të Edi Ramës nga Kuçi në Pogradec.

“Java që kaloi u mbyll me shelegët e Kuçit dhe koranin e Pogradecit. Barkderrat e shtetit nuk kanë të ngopur.
Në një kohë kur prej mbi 3 muajve protestohet në rrugët e Tiranës kundër një qeverie që nuk ka legjitimitet, protestohet kundër një qeveri armike në qëndrimet e saj ndaj qytetarëve, Edi Rama ka zgjedhur ahengjet qeveritare.
Duhet ta mësoni ju se, Kuçi ka shumë gjëra për të cilat është i njohur, por edhe për shelegët dhe gatimin e tyre.
Dhe kjo ishte arsyeja e takimit në Kuç.
Korani nuk ka nevojë për komente.
Po cili ishte rezultati i këtyre takimeve? Mashtrime, mashtrime dhe vetëm mashtrime.
Çfarë doli nga Pogradeci? U mblodhën për të zgjidhur hallet e kombit. Çfarë solli si rezultat kjo mbledhje?
Do më shkruante një mik i imi pensionist: dua ta falënderoj atë plakun që përqafoi Edi Ramën se na shpëtoi nga ulja e pensioneve.
Çfarë solli? Çfarë dëgjuan nxënësit, mësuesit e këtij vendi për vitin e ri shkollor?
Çfarë dëgjuan të sëmurët e Shqipërisë për shëndetin e tyre?
Çfarë dëgjuan mbi 30% e shqiptarëve, që janë në rrezik për kafshatën e gojës, janë të kërcënuar nga uria sipas të dhënave të fundit të FAO-s?
Dëgjuan se do merremi me ushqimin.
Çfarë dëgjuan qytetarët shqiptarë, që në Tiranë duhet të paguajnë qira më shumë se 2/3-tat e rrogës së tyre?
Çfarë dëgjuan studentët, të cilët nisin vitin e ri shkollor në universitet në pamundësi për të paguar qiratë e larta, apo të rinjtë për të blerë një strehë familjare?
Pra, a mund të imagjinohet një shkëputje stratosferike e tillë, e cila shpreh një shkallë stratosferike inkriminimi të Edi Ramës dhe organizatës së tij kriminale, që kalojnë nga ahengu qeveritar në aheng tjetër qeveritar dhe bëjnë sikur në Shqipëri nuk ndodh asgjë,” tha Sali Berisha duke fol dhe për nevojën urgjente që ka Shqipëria në këtë situatë alarmante ku vend kërcënohet nga uria.

“Shqipëria ka nevojë urgjente për vendosjen e minimumit jetik.
Të dhënat e fundit mbi kërcënimin e urisë janë kambanat më alarmuese, të cilët kërkojnë para së gjithash vendosjen e minimumit jetik dhe heqjen e TVSH-së për të gjitha ushqimet bazë.
Kërkojnë subvencionimin e qirave strategjike nga narko-eurot dhe narko-dollarët. Kërkojnë dorëheqjen e menjëhershme të Edi Ramës, i cili ka humbur çdo legjitimitet.
Nuk është legjitim për shkak të farsës elektorale. Nuk është legjitim për shkak të mbrojtjes së korrupsionit dhe vjedhjeve që ka bërë. Nuk është legjitim për shkak të instalimit të narko-shtetit në Shqipëri dhe diktaturës autoritare.
Nuk mund të ketë një fjalim të tij, në qoftë se, ose nuk fillon me hale, ose nuk mbyllet me hale. E ka të pamundur!
Ky ka ngelur në fazën e kompleksit anal. Si mund ta shpjegoj ndryshe?
Sulmon me fjalë të tilla protestën, zërin e fuqishëm qytetar, të cilin po e dëgjon gjithë bota, por jo njeriu i paligjshëm.”

Ndryshe, Organizata e Kombeve të Bashkuara për Ushqimin dhe Bujqësinë, FAO, përveç se konfirmon se 31.8 për qind e shqiptarëve përballen me pasiguri ushqimore të moderuar ose të rëndë ose më shumë se katrfishi i mesatares së Bashkimit Evropian, situata është e rëndë edhe krahasuar me Ballkanin Evropian, ku pasiguria ushqimore e moderuar ose e rëndë vlerësohet 9.2 për qind në Maqedoninë e Veriut, 9 për qind në Malin e Zi, 8.7 për qind në Bosnje Hercegovinë dhe 6.7 për qind në Serbi.