Ministri për arrestimin e Opozitës, i painformuar për trafikun e drogës përmes Liqenit të Shkodrës dhe…

Ministri i Brendshëm, Sandër Lleshaj, ka mohuar se kishte dijeni për trafikimin e 1 ton droge përmes Liqenit të Shkodrës apo pikave kufitare nga Shqipëria drejt Malit të Zi, nga muaji maj deri tani por rezulton se ministri i angazhuar për arrestimin e rivalëve politik nuk ishte në dijeni edhe për faktin se arrestimet që ka kryer policia e drejtuar nga ai, janë shpallur të paligjshme nga Gjykata e Apelit Shkodër.

“Sa i përket trafikut të drogës mes Shqipërisë dhe Malit të Zi përmes liqenit të Shkodrës apo pikat e kalimit kufitar nuk jam i informuar se janë kapur 1 ton drogë nga maji deri tani. Lufta ndaj trafikut të drogës është një prioritet i Policisë së Shtetit. Ne nuk mund ta konsiderojmë ende të mbaruar luftën ndaj trafikut të drogës por di që kemi shkatërruar në mënyrë thelbësore gjithë rrjetet e kultivimit të cannabisit në Shqipëri dhe gjithë treguesut e këtij viti provojnë faktin që fenomeni është goditur dhe është shkatërruar. Sigurisht ka perpjekje sporadike të cilat po ndiqen me seriozitet të madh nga policia,” tha Ish-Gjeneral Sandër Lleshaj pas përurimit të pikës së kalimit kufitar në Hanin e Hotit duke konfirmuar se nuk ishte kjo çështja e vetme që kishte të bënte me Policinë e Shtetit dhe është i painformuar.

I pyetur lidhur me paralajmërimin e Përfaqësuesit ligjor të PD, Ivi Kaso, dje nga Shkodra për padi ndaj policisë dhe Ministrisë së Brendshme për arrestim të paligjshëm të simpatizantëve demokratë,  ai tha se policia arreston vetëm qytetarë që shkelin ligjin.

“Policia e Shtetit nuk arreston simpatizantë të partive politike. Policia e Shtetit arreston qytetarë që shkelin ligjin,” tha Ish-Gjeneral Sandër Lleshaj që bazuar në vendimin e gjykatave rezulton se pikërisht kjo po ndodhë, policia po arreston vetëm simpatizantë të partive politike.

Dhe jo vetëm kaq! Madje ai tha se nuk ishte në dijeni as për vendimin e Gjykatës së Apelit që arrestimet e Policisë së Shtetit i ka konsideruar të paligjshme dhe ka liruar ata që policia e Ish-Gjeneral Sandër Lleshajt i ka konisderuar sulmues dhe zjarrvënës të KZAZ dhe i ka arrestuar.